13. กุลทูสก สงฺฆาทิเสส สิกฺขาปุจฺฉา

ปุจฺฉา – ยํ เตน อาวุโส ภควตา…เป.… สมฺมาสมฺพุทฺเธน กุลทูสกสฺส ภิกฺขุโน ยาวตติยํ สมนุภาสนาย อปฺปฏินิสฺสชฺชนฺตสฺส สงฺฆาทิเสโส กตฺถ ปญฺญตฺโตฯ

วิสฺสชฺชนา – สาวตฺถิยํ ภนฺเต ปญฺญตฺโตฯ

ปุจฺฉา – กํ อารพฺภ อาวุโส กิสฺมิํ วตฺถุสฺมิํ ปญฺญตฺโตฯ

วิสฺสชฺชนา – อสฺสชิ ปุนพฺพสุเก ภนฺเต ภิกฺขู อารพฺภ ปญฺญตฺโต, อสฺสชิปุนพฺพสุกา ภนฺเต ภิกฺขู สงฺเฆน ปพฺพาชนียกมฺมกตา ฉนฺทคามิตา โทสคามิตา โมหคามิตา ภยคามิตา ปาเปสุํ, ตสฺมิํ ภนฺเต วตฺถุสฺมิํ ปญฺญตฺโตฯ

อนิยต สิกฺขาปุจฺฉา

ปุจฺฉา – ยํ เตน อาวุโส ภควตา…เป.… สมฺมาสมฺพุทฺเธน ปฐโม จ อนิยโต ทุติโย จ อนิยโต กตฺถ ปญฺญตฺโตฯ

วิสฺสชฺชนา – สาวตฺถิยํ ภนฺเต ปญฺญตฺโตฯ

ปุจฺฉา – กํ อาวุโส อารพฺภ กิสฺมิํ วตฺถุสฺมิํ ปญฺญตฺโตฯ

วิสฺสชฺชนา – อายสฺมนฺตํ ภนฺเต อุทายิํ อารพฺภ ปญฺญตฺโต, อายสฺมา ภนฺเต อุทายี มาตุคาเมน สทฺธิํ เอโกเอกาย รโห ปฏิจฺฉนฺเน อาสเน อลํกมฺมนิเย นิสชฺชํ กปฺเปสิ, ตสฺมิญฺจ วตฺถุสฺมิํ, อายสฺมาเยว ภนฺเต อุทายี มาตุคาเมน สทฺธิํ รโห นิสชฺชํ อกาสิ, ตสฺมิญฺจ ภนฺเต วตฺถุสฺมิํ ปญฺญตฺโตฯ